ATM-ല്‍ നിന്നും കാശെടുത്ത് പുറത്തു കടക്കുന്നവരെ തേടിയെത്തിയെക്കാവുന്ന പുതിയ രീതിയിലുള്ള തട്ടിപ്പിന്‍റെ വിവരമാണിത്. UAE cid വകുപ്പ് കളവ് എങ്ങിനെ നടന്നേക്കാം എന്ന് വരച്ചു വിവരിച്ചിരിക്കുകയാണിവിടെ. നാട്ടിലും പുറത്തുമുള്ള എല്ലാവരും ഒന്ന് ശ്രദ്ധിക്കുന്നത് നന്ന്.

ഗള്‍ഫ് രാജ്യങ്ങളിലെ വലുതും ചെറുതുമായ ഒട്ടുമിക്ക കമ്പനികളുടെയും പൈസ ഇടപാടുകള്‍ കൈകാര്യം ചെയ്യുന്നതില്‍ വലിയൊരു ശതമാനം നാം മലയാളികള്‍ ഉള്‍പെടുന്ന ഇന്ത്യക്കാരാണ്. കമ്പനിയുടെ വലിയ തുകയുമായി ബാങ്കില്‍ പോയി പൈസ അടക്കലും അതുപോലെ പൈസ എടുക്കലും നടത്തുന്നത് നാം വിദേശികള്‍ ആണ്. അതില്‍ ആര്‍ക്കെങ്കിലും കഷ്ടകാലത്തിനു  ഇത് പോലെ വല്ലതും സംഭവിച്ചാല്‍ കാലാകാലം നാടും വീടും കാണാതെ നഷ്ടപ്പെട്ട തുക തിരിച്ചടക്കുന്ന വരെ ആ കമ്പനിക്ക് വേണ്ടി ജോലിയെടുക്കേണ്ടി വരും മുതലാളിയായ അറബി പിടിവാശിക്കാരന്‍ ആണെങ്കില്‍. ഇനി സ്വന്തം കാശാണ് ഇതുപോലെ നഷടപ്പെടുന്നത് എങ്കില്‍ അവര്‍ക്ക് ഇതുപോലെ മുന്നോട്ടുള്ള ജീവിതം നഷ്ടമാവില്ലെങ്കിലും പോവുന്ന കാശും സമയവും നഷ്ടം തന്നെയല്ലേ?

വിവരങ്ങള്‍ക്ക് കടപ്പാട്: ഗള്‍ഫ്‌ ന്യൂസ്

ഇതാരാണെന്ന് ചോദിച്ചാല്‍… അളേളണ് നമ്മക്കറിയൂലാ. പിന്നെ for‍ what‌? എന്നാണെങ്കില്‍… ചുമ്മാ, ചുമ്മാ വെറുതെ. കാണാത്ത എല്ലാവരും ഒന്ന് കണ്ടോട്ടെ എന്ന് കരുതി, അത്രമാത്രം.

ഈ കഴിഞ്ഞ ആഴ്ച റിയാദിലെ ബത്ത എന്ന വലിയങ്ങാടിയിലൂടെ ഒന്ന് കറങ്ങിയപ്പോള്‍ ഒരാള്‍ക്കൂട്ടം. ഒന്ന് എത്തി നോക്കിയതാണ്. അതിനു മുമ്പേ ഒരാള്‍ അതാ തലയെടുപ്പോടെ തലയില്‍ തൊപ്പിയും വെച്ച് ആള്‍ക്കൂട്ടത്തിനു നടുവില്‍ നിന്നും ഇങ്ങോട്ട് നോക്കി നില്‍ക്കുന്നു. ഒന്ന് സൂക്ഷിച്ചു നോക്കി, കക്ഷി നില്‍ക്കുകയല്ല ഇരിക്കുകയാണ്. ഇരുന്ന ഇരുപ്പില്‍ തന്നെ എല്ലാവരെയും ചെറുതാക്കിക്കളഞ്ഞു കൊച്ചു കള്ളന്‍ (ഫോട്ടോ കാണൂ). പിന്നെ കുറച്ചു കഴിഞ്ഞു ഒന്ന് നില്‍ക്കാന്‍ എല്ലാവരും കൂടി ഓരിയിട്ടപ്പോള്‍ പുള്ളി നിന്ന ആ നില്‍പാണ്‌ അടുത്ത ഫോട്ടോയില്‍ കാണുന്നത്. കൂടെ കൂട്ടിനു തനിക്കൊത്ത രണ്ടു പക്രുമാരും ഉണ്ട്.

 തുര്‍ക്കിക്കാരന്‍ സുല്‍ത്താന്‍ കൊസെന്‍ ആണ് പുതിയ ഗിന്നസ്‌ റിപ്പോര്‍ട്ട് പ്രകാരം ലോകത്തിലെ ഏറ്റവും ഉയരും കൂടിയ മനുഷ്യന്‍. അത്രത്തോളം ഇല്ലെങ്കിലും ഇവനും കണ്ട കാഴ്ചയില്‍ മോശക്കാരനല്ല.

ചുറ്റും കൂടിയ എല്ലാവര്‍ക്കും കൌതുകം. കുറെ പേര്‍ ഒന്നിച്ചു നിന്ന് ഫോട്ടോ എടുത്തു. ചിലര്‍ തങ്ങളുടെ സ്വന്തം മൊബൈലില്‍ തങ്ങളാല്‍ ആവുന്ന വിധം ഇരുന്നും ചെരിഞ്ഞും കിടന്നും പല പോസിലും ഫോട്ടോസ് എടുത്തു. കൂട്ടത്തില്‍ ഞാനും.

ബത്തയില്‍ തിങ്ങിക്കൂടുന്ന ഇന്ത്യക്കാരന്റെയും ബംഗാളിയുടെയും പച്ചയുടെയും (പാക്‌) ചന്ദം കാണാന്‍ വെറുതെ ഇറങ്ങിയതായിരുന്നില്ല ഈ കൊച്ചു-വലിയ മഹാന്‍മാര്‍. കൂടെ നിന്ന് ഫോടോയെടുത്ത മഹാമനസ്കരുടെ കയ്യില്‍ നിന്നും 10 റിയാലും ഈടാക്കിയാണ് ഇവര്‍ തങ്ങളുടെ അടുത്ത കേന്ദ്രത്തിലേക്ക് പോയത്.

എന്ന് പറഞ്ഞാലെങ്ങേനാടാ ഉവ്വേ.. ഇവര്‍ക്കും ജീവിക്കേണ്ടായോ? എന്ന് നിങ്ങളില്‍ പലരും ചിന്തിച്ചേക്കാം. അതെ, വളര്‍ച്ചയിലെ ഏറ്റക്കുറച്ചില്‍ കാരണം ഇവര്‍ക്ക് സാധാരണക്കാരെ പോലെ ഔദ്യോഗിക പദവികളിലേക്ക് അര്‍ഹത ലഭിക്കുന്നില്ല, അപ്പോള്‍ ഇത് തന്നെയാണ് ഇവരുടെ വരുമാന മാര്‍ഗ്ഗം. സന്‍‍മനസ്സുള്ളവര്‍ സഹായിക്കട്ടെ.

പക്ഷെ പറഞ്ഞിട്ടെന്തു കാര്യം; ഇതാ രാജ്യത്തിന്‍റെ തലസ്ഥാനത്ത് നോമ്പ് ഒന്നിന് തന്നെ നടന്നു കൂട്ടം കൂടിയൊരു ബ്രേക്ക്‌ഫാസ്റ്റ്‌.

ഇതൊരു സമൂഹ ബ്രേക്ക്‌ഫാസ്റ്റ്‌. പ്രാതല്‍ ഭോജനമല്ല ഞാന്‍ ഉദ്ദേശിച്ചത്. പകല്‍ മുഴുവന്‍ അന്നപാനീയങ്ങള്‍ വെടിഞ്ഞു പ്രാര്‍ത്ഥനകളില്‍ മാത്രം മുഴുകി എടുത്ത പുണ്യ വ്രതത്തിന്‍റെ ഒരു ദിവസത്തെ പരിസമാപ്തി. ദല്‍ഹി ജുമാ മസ്ജിദില്‍ ഈ റമളാന്‍ ഒന്നിന് വിശ്വാസികള്‍ ഒന്നിച്ചിരുന്നു നോമ്പ് തുറക്കുന്ന ഈ കാഴ്ച കണ്ണിനും  മനസ്സിനും കൌതുകമേകും.

മറ്റൊരു

ഈ മാസത്തെ പുന്ന്യത്തെക്കുറിച്ചും പ്രസക്തിയെ കുറിച്ചും എല്ലാവര്‍ക്കും വളരെ നന്നായി അറിയാവുന്നതാണ്. അതുകൊണ്ട് ഞാനത് ആവര്‍ത്തിക്കുന്നില്ല. ഒന്ന് പറയാം മനസ്സും ശരീരവും കൂടുതല്‍ അല്ലാഹുവിലേക്ക് ആര്‍പ്പിച്ച് പാപമോക്ഷം കൈവരിക്കാന്‍ നമുക്ക് കിട്ടുന്ന സുവര്‍ണാവസരമാണിത്.

അടുത്ത റമളാനെ വരവേല്‍ക്കാന്‍ നമ്മളില്‍ ആരൊക്കെ കാണുമെന്നു നമ്മളില്‍ ആര്‍ക്കും അറിയില്ല അള്ളാഹുവിനല്ലാതെ. “The clock is running. Make the most of today. Time waits for no man. Yesterday is history, Tomorrow is a mystery, Today is a gift. That’s why it is called the Present.” …എന്ന് വെച്ചാല്‍ കൂടുതല്‍ സമയം ബ്ലോഗ്ഗിലും നെറ്റിലും അവിടെയും ഇവിടെയുമായി തങ്ങിയും കറങ്ങിയും നടക്കാതെ ഈ സുവര്‍ണാവസരത്തെ പ്രയോജനപ്പെടുത്തുക. ‘റമളാന്‍ കരീം‘

ഇത് ഇന്ത്യന്‍ യുവത്വത്തിന്‍റെ ആകെ രോമാഞ്ചം. ബോളിവുഡ്‌ സിനിമാ നിര്‍മ്മാതാക്കള്‍ക്കിടയിലെ ഒരേയൊരു ‘പൈസാവസൂല്‍’ താരം. ഈ താരത്തിന്‍റെ പുറത്തു ഒന്നും ചിന്തിക്കാതെ കോടികള്‍ മുടക്കാന്‍ നിര്‍മ്മാതാക്കള്‍ തയ്യാറാണ്. ഇദ്ദേഹത്തിന്‍റെ പേര് ഖാന്‍, അതെ ഇദ്ദേഹത്തിന്‍റെ പേര് ഖാന്‍ എന്ന് തന്നെയാണ്. അതുകൊണ്ടാണല്ലോ ഇന്ത്യയുടെ സ്വാതന്ത്ര്യ ദിനത്തോടനുബന്തിച്ചു അമേരിക്കയില്‍ പരിപാടികളില്‍ പെങ്കെടുക്കാന്‍ പോയ നമ്മുടെ സ്വന്തം ‘കിംഗ്‌ ഖാനെ’ നെവാര്‍ക്ക് എയര്‍പോര്‍ട്ടില്‍ രണ്ടു മണിക്കൂറോളം അധികൃതര്‍ തടഞ്ഞു വെച്ചത്. കാരണം പേരിന്‍റെ വാല്‍ ഖാനായത് കൊണ്ട്. ഒന്ന് ഫോണ്‍ ചെയ്യാന്‍ പോലും അനുവദിചില്ലത്രെ. ഏതായാലും സംഗതി കഴിഞ്ഞു. ഇനി അമേരിക്കയുടെ മണ്ണില്‍ കാലു കുത്താന്‍ വരെ മനസ്സില്ല എന്ന് തീരുമാനിച്ചിരിക്കുകയാണ് കക്ഷി.

അമേരിക്കയുടെ സുരക്ഷക്കായി അവിടെ വന്നിറങ്ങുന്ന എല്ലാ യാത്രക്കാരുടെയും ഊരും പേരും മുണ്ടും ഷൂവും പോരാഞ്ഞ് അണ്ടര്‍വെയര്‍, …..ഓ സോറി, മുണ്ടല്ലെ ഉടുത്തിരിക്കുന്നത് അപ്പൊ കോണകം എന്ന് പറയുന്നതാവും ശരി, വരെ ഊരിപ്പിക്കാന്‍ മുകളില്‍ നിന്ന് കല്‍‌പനയുണ്ട്. അതവര്‍ നടത്തിക്കോട്ടെ. പക്ഷെ ഇങ്ങനെ മുസ്ലിമിനെയും ചില പേരിനെയും തേടിപ്പിടിച്ചു ബാലിയാടാക്കുന്നത് ഒരിക്കലും അനുകൂലിക്കാന്‍ പറ്റില്ല. ഇതൊരുമാതിരി പുളയുന്ന സ്ഥലത്ത് ചൂണ്ടയിടുന്ന പോലെയാ. ഇങ്ങനെയായാല്‍ യഥാര്‍ഥത്തില്‍ പിടിക്കപ്പെടെണ്ടവര്‍ മാന്യന്‍മാരെ പോലെ പുറത്തു കടന്നു സംഗതിയും നടത്തി വാലും ചുരുട്ടി തിരിച്ചു പോവും. എന്നിട്ട് എല്ലാ കുറ്റവും മറ്റുള്ളവന്റെ പേരിലും.

യാദ്രിശ്ചികമാണെങ്കിലും നമ്മുടെ ഈ ഖാന്‍റെ ഇനി വരാന്‍ പോവുന്ന സിനിമയുടെ പേരും (My Name is Khan) അതിന്‍റെ കഥയും എല്ലാം ഈ സംഭവവുമായി നല്ല സാമ്യമുണ്ട്‌.

നമ്മുടെ സ്വന്തം മമ്മുക്കക്കും ഇതുപോലെ ഒരനുഭവം ഉണ്ടായിട്ടുണ്ട്. പേരിന്‍റെ കൂടെ ‘ഇസ്മായില്‍’ എന്ന് കണ്ടതിനായിരുന്നു അത്.

ഇനി ഇടാന്‍ പോവുന്ന പേരുകള്‍ നമുക്ക് ശ്രദ്ധിക്കാം. പക്ഷെ നമ്മുടെയും നമ്മുടെ പിതാക്കാന്‍മാരുടെയും പേരുകള്‍ എങ്ങിനെ മാറ്റാന്‍ പറ്റും ഇതുപോലത്തെ എടാകൂടത്തില്‍ പെടാതെയിരിക്കാന്‍. …ഉപദേശിച്ചാലും.

രാജ്യം അറുപത്തിമൂന്നാം സ്വാതന്ത്ര്യ ദിനം ഇന്നാചരിക്കുന്നു. എല്ലാ ബ്ലോഗ്‌ സന്ദര്‍ശകര്‍ക്കും സുഹൃത്തുക്കള്‍ക്കും ഈ ബ്ലോഗ്ഗരുടെ വക ആശംസകള്‍.

സ്വാതന്ത്ര്യം ലഭിച്ചിട്ട് 62 വര്‍ഷങ്ങള്‍ കഴിഞ്ഞിട്ടും ഇന്നും പൂര്‍ണ സ്വാതന്ത്ര്യം എന്നത് നാം ഇന്ത്യക്കാര്‍ക്ക് അന്യം തന്നെയാണ്. ഒരുപാട് വെല്ലു വിളികള്‍ക്കും പ്രതിസന്തികള്‍ക്കും ഇടയില്‍ കുറച്ചു വര്‍ഷങ്ങളായിട്ട്‌ തെല്ലു ഭയത്തോടെയല്ലാതെ ഈ ദിവസം നമുക്ക് ആഘോഷിക്കാന്‍ പറ്റുന്നില്ല. നാല് ഭാഗത്ത് നിന്നുമുള്ള വെല്ലുവിളികള്‍ക്ക് പുറമെ തീവ്രവാതം ഇന്ന് രാജ്യത്തിന്‍റെ ഉറക്കം കെടുത്തിയിരിക്കുകയാണ്. അതുകൊണ്ട് തന്നെയാണ് ഈ ഒരു ദിവസത്തേക്ക് വേണ്ടി മാസങ്ങള്‍ക്ക് മുന്നേ തന്നെ സുരക്ഷ ക്രമീകരണങ്ങള്‍ക്ക് തുടക്കം കുറിക്കുന്നത്. മുമ്പൊക്കെ ഇങ്ങനെ ഒന്നിന്റെ ആവശ്യമില്ലായിരുന്നു. ഈ വെല്ലുവിളികളെയെല്ലാം വേരോടെ തന്നെ പിഴുതെറിയണം. എന്നാലെ നമുക്ക് മനസ്സ് തുറന്നൊന്നു സ്വാതന്ത്ര്യം എന്ന് പറയാനും ആഘോഷിക്കാനും പറ്റുകയുള്ളൂ.

എങ്കിലും ഈ എല്ലാ വെല്ലുവിളികളെയും തരണം ചെയ്തു ഒരു ഇന്ത്യന്‍ പൌരനെന്ന നിലയില്‍ അഭിമാനത്തോടെ നമുക്കീ ആഘോഷത്തില്‍ പങ്കു ചേരാം. …ജയ്‌ ഹിന്ദ്‌.

വെറും ഒരു യൂറോപ്യന്‍വ്യാധി എന്ന ലാഖവത്തോടെ കണ്ടിരുന്ന A/H1N1 വൈറസ്‌ പന്നിപ്പനി (swine flu) ഇന്ന് ലോകമാകെ പടര്‍ന്നിരിക്കുകയാണ്. ഇതുവരെ ലോകമെമ്പാടും 2,000ലധികം പേര്‍ ഈ പനി മൂലം മരണമടഞ്ഞിട്ടുണ്ട്. ഈ കഴിഞ്ഞ ജൂലൈ മാസത്തിന്റെ അവസാനത്തില്‍ ജനീവ ആസ്ഥാനമായ ആരോഗ്യവകുപ്പിന്‍റെ റിപ്പോര്‍ട്ടില്‍ രണ്ടു ലക്ഷത്തോളം ആളുകള്‍ക്ക് ഈ രോഗം ബാധിച്ചതായി സ്ഥിരീകരിച്ചിട്ടുണ്ട്. ഇന്ത്യയില്‍ ഇതുവരെയായി 10 മരണം സ്ഥിരീകരിച്ചു. മൂന്നില്‍ ഒരാള്‍ എന്ന അനുപാദത്തില്‍ ഈ രോഗം പകരുമെന്നാണ് ഏറ്റവും പുതിയ റിപ്പോര്‍ട്ടില്‍ പറയുന്നത്.

സാധാരണ പനിയുടെ ലക്ഷണത്തിന് പുറമെ പന്നിപ്പനിക്ക് ചുമ, കഫക്കെട്ട്, മൂക്കൊലിപ്പ്, ശരീരമാസകലം വേദന, തലവേദന, കുറച്ചു സമയത്തെ വിറയലോട്‌ കൂടുയുള്ള പനി, ക്ഷീണം പിന്നെ ചിലപ്പോള്‍ വയറിളക്കവും ച്ചര്‍ദ്ദിയും അനുഭവപ്പെടും. പൊതുവെ ഈ പനി ബാധിച്ചവര്‍ക്ക്‌ ഇവയില്‍ ഏതെങ്കിലും രണ്ടു ലക്ഷണങ്ങള്‍ കണ്ടു വരുന്നുണ്ട്.

ഇന്ത്യയില്‍ ദിവസം ചെല്ലും തോറും വിവിധ തരം പനികള്‍ ബാധിച്ച രോഗികളുടെ എണ്ണം വര്‍ധിക്കുന്നത് കാരണം ഗവന്‍മെന്റ് ആശുപത്രികളില്‍ എല്ലാം തിരക്കോട് തിരക്ക്. പലരും ഈ ബുദ്ധിമുട്ട്‌ കണക്കിലെടുത്ത് സ്വകാര്യ ആശുപത്രികളെ സമീപിക്കുകയാണ് ഗവന്‍മെന്റ് ആശുപത്രികളില്‍ തന്നെ പോയി ചികിത്സിക്കണമെന്ന അധികാരികളുടെ നിര്‍ദ്ദേശം അവഗണിച്ച്.

ചുമക്കുമ്പോഴും തുമ്മുമ്പോഴും ടവ്വലോ ടിഷ്യൂവോ ഉപയോകിക്കുക. പന്നിപ്പനി ബാധിച്ചവര്‍ മറ്റുള്ളവരുമായുള്ള സമ്പര്‍ക്കം ഒഴിവാക്കുക. പന്നിപ്പനിക്കെതിരെയുള്ള വാക്സിന്‍ വരുന്ന ഒക്ടോബറില്‍ ലഭ്യമാകും എന്നാണു പ്രതീക്ഷിക്കുന്നത്. അതുവരെയും മുന്‍കരുതലുകള്‍ മാത്രമാണ് ഒരു പോംവഴി. പന്നിപ്പനി എളുപ്പത്തില്‍ ബാധിക്കാന്‍ സാദ്യതയുള്ള ചെറിയ കുട്ടികള്‍, മുതിര്‍ന്നവര്‍, ഗര്‍ഭിണികള്‍ എന്നിവര്‍ എത്രയും പെട്ടെന്ന് കൂടുതല്‍ മുന്‍കരുതലുകള്‍ എടുക്കേണ്ടതാണ്.

സ്വകാര്യ ആശുപത്രി ഉടമകളോടും ഡോക്ടര്‍മാരോടും ഒരപേക്ഷ ദയവു ചെയ്തു കച്ചവട കണ്ണുകൊണ്ട് ഈ രോഗവുമായി വരുന്നവരെ നിങ്ങള്‍ കാണരുത്. അവര്‍ക്ക് വേണ്ട ശരിയായ ചികിത്സാരീതികള്‍ നിര്‍ദേശിക്കുക. നിങ്ങളുടെ പക്കല്‍ അതിനുള്ള സംവിധാനങ്ങള്‍ ഇല്ലെങ്കില്‍ അവരെ ഉടനെ തന്നെ അടുത്ത കേന്ദ്രങ്ങളിലേക്ക് പറഞ്ഞയക്കുക. വേണ്ട എല്ലാ മാര്‍ഗ്ഗനിര്‍ദ്ദേശങ്ങളും കൊടുക്കുക.

കക്ഷി രാഷ്ട്രീയ മത ഭേദമന്യേ എല്ലാവര്‍ക്കും ഒത്തൊരുമിച്ചു നിന്ന് നമുക്കീ വിപത്തിനെതിരെ പോരാടാം. എല്ലാത്തിനും പുറമെ നമുക്ക് പ്രാര്‍ത്ഥിക്കാം.

ഈ സ്ത്രീപീഡന നിയമം വന്നതിനു ശേഷം നമ്മുടെ നാട്ടില്‍ എത്രയോ ജഗജില്ലികളായ അമ്മായിയമ്മമാര്‍ പത്തി മടക്കിയിട്ടുണ്ട്. പീഡനത്തിന്റെ പേരില്‍ കുടുങ്ങിയാലുള്ള നിയമക്കുരുക്കുകളെയും നൂലാമാലകളെയും പേടിച്ചു മിണ്ടാതെ ഉരിയാടാതെയാണ് വന്നു കയറുന്ന മഹാലക്ഷ്മിയോടു (ഭദ്രകാളിയെന്നു മനസ്സില്‍ കരുതിയാലും) ഇവര്‍ പെരുമാറുന്നത്. ഇവരില്‍ പലര്‍ക്കും പിന്നീട് മാതൃകാ അമ്മായിയമ്മക്കുള്ള പാരിതോഷികങ്ങള്‍ പല ടെലിവിഷന്‍ പരിപാടികളിലും കൊടുക്കുന്നത് നമ്മള്‍ കണ്ടതുമാണ്.

എന്നാല്‍ അങ്ങനെ അമ്മായിയമ്മയെ ഇനി വരച്ച വരയ്ക്കു നിര്‍ത്താന്‍ വരട്ടെ! നമ്മുടെ നാട്ടിലെ എല്ലാ അമ്മായിയമ്മമാര്‍ക്കും പിന്നെ കെട്ടിയ പെണ്ണിന്‍റെ കണ്ണുനീരില്‍ അമ്മാനമാടാന്‍ ആഗ്രഹിക്കുന്ന പുയ്യാപ്പളമാര്‍ക്കും നല്ല കാലം വരാന്‍ പോവുന്നു. പിന്നെ പ്രത്യേഗിച്ച് പറയേണ്ടതില്ലല്ലോ നമ്മുടെ മഹാലക്ഷ്മിമാരുടെ കഷ്ടകാലം. നമ്മുടെ പരമോന്നത സുപ്രീംകോടതി ഇന്നലെ പുറപ്പെടുവിച്ച വിധിയില്‍ മരുമകളെ തോഴിക്കുന്നതും പിന്നെ ‘നിന്നെ മൊഴി ചെല്ലുമെടീ, ത്വലാക്ക് ചെല്ലുമെടീ, വിധവയാക്കുമെടീ’ എന്ന് പറയുന്നതൊന്നും ഇനി മുതല്‍ ക്രൂരതയല്ലത്രേ. ഇവരെ ഇതിന്‍റെ പേരില്‍ നിയമ നടപടിക്ക് വിധേയരാക്കാന്‍ പറ്റില്ല. അതുപോലെ തന്നെ അമ്മായിയമ്മയുടെ നിരന്തരമായ പഠിപ്പിക്കാലോ നാലാളുടെ ഇടയില്‍ ഇട്ടു നടക്കാന്‍ കൊള്ളാത്ത വസ്ത്രം മരുമകളെ ധരിപ്പിക്കാലോ ഒന്നും നമ്മുടെ നിയമവ്യവസ്ഥയിലെ 498A-ക്ക് കീഴില്‍ നിയമനടപടിക്ക് സാധുതയില്ലത്രേ.

പിന്നെ മരുമകള്‍ക്ക് ആകെയുള്ള ഒരാശ്വാസം, അമ്മായിമ്മക്കെതിരെ വിശ്വാസ വഞ്ചനക്കെതിരെ കേസെടുക്കാന്‍ പറ്റും എന്നതാണ്. അതിപ്പോള്‍ എന്തിനാണെന്ന് വെച്ചാല്‍…. കല്യാണത്തിനും മറ്റും ദമ്പതികള്‍ക്ക് കിട്ടുന്ന സമ്മാനങ്ങളും മറ്റും മോഷ്ടിച്ചതിന്റെ പേരില്‍. …….എങ്ങിനെ എങ്ങിനെയുണ്ട്‌ കേസുകെട്ടുകള്‍!

ഒരു വാക്ക്: ഇതെല്ലാം കേട്ട് ആലങ്കുഷരായി വെറുങ്ങലിച്ചു നില്‍ക്കുന്ന മഹാലക്ഷ്മി മരുമകളെ ….don’t worry നാളത്തെ അമ്മായിയമ്മയുടെ റോള്‍ നിങ്ങള്‍ക്കുള്ളതാണ് .….be prepared.